إيه هي الـ Motherboard
الماذربورد (اللوحة الأم) هي القطعة الكبيرة اللي بتربط كل أجزاء الكمبيوتر ببعض
يعني تقدر تقول إنها العمود الفقري بتاع الجهاز. كل حاجة بتشتغل جوه الكمبيوتر لازم تتوصل فيها المعالج، الرامات، كارت الشاشة، الهارد... إلخ.
الماذربورد مش اختراع جديد، كانت موجودة زمان في الكمبيوترات العملاقة (Mainframe)
بس زمان كانت بسيطة جدًا، كانت فيها البروسيسور وكام مكان تتركب فيهم كروت
الناس كانت بتركب كل حاجة لوحدها — كارت الهارد، كارت الرامات... إلخ
أول شركة تعمل ماذربورد مختلفة عن تصميم IBM كانت شركة اسمها Compaq، ولما حققت نجاح، الشركات كلها بدأت تقلدها.
الشركات الكبيرة دلوقتي مين؟
أكبر شركة في الماذربوردات اسمها ASUS (آسوس) ومسيطرة على حوالي 13% من السوق.
وفي شركات تانية زي MSI وGigabyte.
حتى Intel لسه بتنتج ماذربوردات، لكن مش زي زمان.
إيه مكونات الماذربورد؟
المعالج (CPU): ده العقل اللي بيفكر ويشغل الجهاز.
السوكت (Socket): المكان اللي بيركب فيه المعالج، ولازم يكون متوافق مع نوع المعالج.
الـ Chipset: شريحة بتربط المعالج بباقي المكونات.
البيوس BIOS: برنامج صغير بيشتغل أول ما تشغّل الجهاز.
الـ RAM slots: الأماكن اللي بتركب فيها الرامات.
المداخل التانية: زي USB, PCI, SATA... إلخ.
لو الماذربورد هي العمود الفقري، يبقى الـ CPU هو المخ، والـ BIOS هو الزرار اللي بيشغّل المخ أول ما تصحى من النوم
يعنى إيه Form Factor؟
دي ببساطة شكل وحجم الماذربورد. يعني هل هي كبيرة؟ صغيرة؟ شكلها إزاي؟
ده بيأثر على نوع الكيسة اللي تركب فيها، ومكان كل جزء.
إيه هي المعايير التانية؟
نوع السوكت: لازم يناسب نوع البروسيسور.
الـ Chipset: دي الشرائح اللي بتربط المعالج بباقي المكونات.
الـ BIOS: بيدير تشغيل الجهاز.
الـ Clock Chip: حافظ الوقت والإعدادات (حتى لما تطفي الجهاز).
المداخل والفتحات زي:
PCI = كروت الشاشة والصوت والشبكة.
AGP = للفيجا زمان.
IDE = للهاردات القديمة.
USB = للفلاشات والطابعات.
SATA = للهاردات الحديثة.
التكنولوجيا الجديدة على الماذربورد:
RAID = تخلي أكتر من هارد يشتغلوا كأنهم هارد واحد.
PCI Express = أسرع بكتير من PCI وAGP.
دلوقتي في ماذربورد فيها كارت صوت وشبكة وڤيجا مدمجين، مش لازم كروت خارجي.
المعالج (CPU) بيتركب إزاي؟
المعالج بيركب في السوكت على الماذربورد، والسوكت ليه نوع لازم يناسب نوع المعالج:
أمثلة
Socket 478: بروسيسورات Pentium قديمة.
Socket 754 / 939: بروسيسورات AMD زمان.
LGA 1200 / 1700 / 3647: معالجات Intel الحديثة، وسوكتها مختلف لأن السنون (Pins) بتكون في الماذربورد مش في المعالج.
وأنت بتبني جهاز جديد، لازم السوكت بتاع الماذربورد والمعالج يكونوا متوافقين.
إيه هو الـ Chipset؟
ده الجزء اللي بيربط المعالج بباقي المكونات.
زمان كان عندنا
Northbridge = بيربط المعالج بالرامات وكارت الشاشة.
Southbridge = بيربط الهاردات واليو إس بي والحاجات التانية.
دلوقتي بقى اسمه:
GMCH: بيتعامل مع الرامات وكارت الشاشة.
ICH: بيتعامل مع الهاردات والـ USB.
الباصات (Buses) دي إيه قصتها؟
باص يعني "طريق" أو "كابل" بين جزئين. كل ما الباص أسرع، الجهاز يبقى أسرع.
أنواع الباصات:
FSB (Front Side Bus): بيربط المعالج بالرام.
Back Side Bus: بيربط المعالج بالـ Cache.
Memory Bus: بيربط الرامات بالمعالج.
PCI Bus: بيربط كروت PCI بالمعالج.
AGP Bus: للكروت الرسومية زمان.
PCIe Bus: الجديد والأسرع، وبيشغل كروت الشاشة الحديثة.
لو الباص بطيء، الدنيا كلها تبقى بطيئة حتى لو المعالج سريع.
الرامات (RAM) بتأثر إزاي؟
الرام هي الذاكرة المؤقتة اللي بيشتغل عليها الجهاز.
كل ما الرام أسرع وأكتر، الجهاز أسرع.
دلوقتي بنستخدم DDR RAM اللي بتنقل البيانات مرتين في كل نبضة، وده أسرع.
الماذربورد بتركب فيها كذا شريحة RAM، ولو فيها Dual Channel يبقى أسرع كمان.
ليه في ناس بتشتري ماذربورد غالية؟
عشان فيها حاجات مدمجة زي كارت شاشة أو كارت صوت
عشان تناسب الشغل التقيل زي الجرافيك أو الألعاب
عشان فيها منافذ حديثة وأسرع (زي PCIe 5.0)
الخلاصه ببساطه
تخيل إن الماذربورد هي مدينة كبيرة!
في المدينة دي:
المعالج (CPU) هو "مبنى الحكومة الرئيسي" – هنا بيتاخد كل قرار، ومنه بتبدأ كل العمليات.
الهارد ديسك هو "مخزن المدينة" – بيخزن فيه كل الملفات القديمة والجديدة.
الرامات (RAM) هي "مكتب العمليات السريعة" – بيسجل فيه الحاجات اللي بتتعمل دلوقتي حالًا.
كارت الشاشة هو "مركز التصميم والعرض" – بيحول البيانات لشكل مرئي.
كارت الصوت هو "إذاعة المدينة" – بيحول الإشارات لصوت.
الـ BIOS هو "مركز التشغيل والطوارئ" – أول مكان يشتغل أول ما المدينة تصحى.
الـ Chipset هو "المسؤول الإداري" اللي بيرتب ويشرف على الاتصال بين كل الأماكن دي.
وكل الأماكن دي ثابتة في أماكنها زي المباني.
طيب إزاي الأماكن دي بتتواصل مع بعض؟ عن طريق "الشوارع"
الشوارع دي اسمها "باصات – Buses"
كل شارع ليه سرعة وعدد حارات
الشوارع هي اللي بتنقل البيانات من مبنى لمبنى
مثال:
شارع FSB بيربط مبنى الحكومة (المعالج) بمكتب العمليات (الرام)
شارع PCIe بيربط المعالج بمركز التصميم (كارت الشاشة)
شارع SATA بيربط مبنى الحكومة بالمخزن (الهارد)
يعني كل ما الشوارع دي تكون واسعة (أسرع)، والمباني تكون قوية وحديثة، المدينة تشتغل أسرع وتنجز أكتر.
دي البداية فى مدينه المازربورد
