CMOS - البطارية
الذاكرة الصغيرة وحارس الوقت في مدينة الماذربورد
CMOS = "Complementary Metal-Oxide Semiconductor"
ده نوع خاص من أنواع شرائح الذاكرة وبتتميز باستهلاكها القليل جدًا للطاقة
وعلشان كده كانت أنسب اختيار إنها تشتغل مع بطارية صغيرة وتفضل محتفظة بالبيانات حتى بعد ما الجهاز يتقفل
طيب بتعمل إيه؟
الـ CMOS بتخزن الإعدادات الحيوية للجهاز زي
ترتيب الإقلاع (Boot Order)
توقيت وتاريخ النظام
إعدادات الهاردات والبورتات
إعدادات حماية الباسورد لو موجودة
بتشتغل إزاي؟
أثناء إيقاف تشغيل الكمبيوتر البطارية بتغذي
شريحة CMOS بطاقة بسيطة علشان تحفظ الإعدادات دي.
أول ما الجهاز يشتغل، BIOS بيروح يقرأ البيانات من CMOS ويبدأ على أساسها.
البطارية
الاسم الشائع: بطارية CMOS
لكن اسمها التقني عادة: CR2032 – بطارية ليثيوم مستديرة.
تقوم بتغذية شريحة CMOS بالطاقة وقت ما الجهاز مطفي.
المحافظة على التوقيت والتاريخ.
غالبًا عمرها الافتراضى من 5 لـ 10 سنين.
أول علامة إنها بدأت تخلص: تلاقي الساعة بتتلخبط كل ما الجهاز يتقفل.
زمان في كل الماذربوردات كان لازم تلاقي شريحة CMOS وبطاريتها.
لكن مع تطور التكنولوجيا بعض اللابتوبات الحديثة دمجوا الإعدادات دي في شريحة مدمجة مع BIOS أو UEFI.
وفي بوردات جديدة بقت تحتفظ بالإعدادات دي حتى من غير بطارية
أو بتستخدم بطارية مختلفة داخلية ما ينفعش تبديلها بسهولة.
مكانها بقى فى المدينه بتاعتنا !!
CMOS زي مكتب الأحوال المدنية
فيه سجل المعلومات الأساسي: أسماء السكان (الهاردات)
أدوارهم (إعدادات البوت)، وبياناتهم الشخصية (تاريخ/وقت).
البطارية زي مولد كهرباء صغير للطوارئ، شغال دايمًا علشان المكتب ده يفضل شغال حتى لو النور قطع (يعني الجهاز اتقفل).
الخلاصه
CMOS + البطارية هما القلب الصغير اللي بيحافظ على هوية الجهاز لما يطفي.
من غيرهم، كل مرة هتشغل جهازك كأنك بتبدأ من الصفر.
وبرغم إن وجودهم قل في بعض الأجهزة الحديثة، لكنهم ما زالوا عنصر أساسي في كتير من الماذربوردات المكتبية واللابتوبات.
